«Հե՛տ բերեք մեր Զոլյանին», «Ազատո՛ւթյուն Բրյուսովին», «Դասադուլ», 
«Արմե՛ն Աշոտյան, իջի՛ր», «Արմե՛ն Աշոտյան, դո՛ւրս արի «Ֆեյսբուքից», «Չկա Զոլյան, չկանք մենք» և նման վանկարկումներով, ինչպես նաև Սուրեն Զոլյանի նկարի պաստառներով մոտ 200-220 ուսանող դասերի ժամին նախ հավաքվել էր Կրթության և գիտության նախարարության շենքի դիմաց:

Բուհի ուսանողներն այս կերպ իրենց բողոքի ձայնն են արտահայտում Արմեն Աշոտյանի երեկվա հրամանի կապակցությամբ՝ լուծարել բուհի նախկին ռեկտոր Սուրեն Զոլյանի հետ աշխատանքային պայմանագիրը, և պահանջում են վերականգնել նրան բուհի ռեկտորի պաշտոնում:

Ցուցարար ուսանողները մինչև վաղը ժամը 2-ը վարչապետ Տիգրան Սարգսյանին ժամանակ են տվել, որ վերանայի Արմեն Աշոտյանի հրամանը։ Իսկ եթե վարչապետը ուսանողներին չընդառաջի, բրյուսովցիները խոստանում են հասնել մինչև ՀՀ նախագահական նստավայր և հացադուլի նստել։

Կրթության նախարարին ուսանողները ներքև են կանչել առավել կոպիտ կոչերով՝ «Աշոտյա՛ն, շարժի՛ր նստատեղդ»:

Ուսանողների պահանջին արձագանքել է ԿԳ նախարարության հասարակայնության հետ կապերի վարչության պետ Արթուր Բաղդասարյանը, ով ուսանողների 10-15 հոգանոց խմբին առաջարկել է բարձրանալ վերև՝ Արմեն Աշոտյանի հետ հարցը քննարկելու: Սակայն առաջարկը մերժվել է:

ԿԳ նախարարի մոտ բարձրացած լրագրողների պատվիրակությունն ուսանողներին փոխանցել է, որ Արմեն Աշոտյանը չի իջնի, քանի որ դա անլուրջ է համարում և նրանց է առաջարկում բարձրանալ ու ներկայացնել խնդիրը:

Այս լուրը ուսանողներն ընդունել են «Աշոտյա՛ն, դու նախարար չես» և «ամո՛թ» վանկարկումներով, որից հետո շարժվել են Կառավարության շենքի մոտ:

Ուսանողները պատրաստվում են բողոքի ակցիան շարունակել մինչև աշխատանքային օրվա ավարտը։